dlvr.it
Vianako Printzea erakundearen oniritzia jasota, Iruñeko Udalak bidea libre du Erorien Monumentua eraldatzeko
Beste urrats bat egin du Iruñeko Udalak, Erorien Monumentua eraldatzeko. Diario de Noticias-ek aurreratu duenez, Vianako Printzea instituzioak oniritzia eman dio udalari mausoleo frankistaren katalogazioa aldatzeko, gaur egun duen babes juridiko maila apaltzeko eta, horrekin lotuta, eraikinaren zenbait elementu botatzeko eta beste batzuk aldatzeko. Monumentua «esanahiberritzea» eta haren «izaera frankista erauztea», horra Iruñeko Udalaren helburua; xede horrekin, arkitektura lehiaketa bat antolatuko dute, eraikina soilik ez, inguru osoa eraberritzeko. Horretarako, baina, udalak ezinbestekoa zuen Vianako Printzearen aldeko txostena, erakunde publiko hori arduratzen baita Nafarroako ondare artistikoa, kulturala eta historikoa katalogatzeaz eta zaintzeaz. Tramite hori bete du jada.
Edonola ere, Vianako Printzearen baimena mugatua dela nabarmendu zuen Iruñeko Udalak, monumentuaren katalogazioa aldatzeko eskaera aurkeztu zuenean. «Babes maila apaldu izanak aukera ematen du nolabaiteko askatasunez lan egiteko, baina mugatutako joko zelai baten barruan». Zer esan nahi du horrek? Bada, Erorien Monumentuari egiten ahal zaizkion aldaketen artean ez dagoela jasota eraikin osoa botatzea. Halaxe adostu zuten EH Bilduk, PSNk eta Geroa Baik ere, iazko azaroan sinatutako hitzarmenean. Elkarte memorialista ugarik gogor kritikatu dute bide hori, eta eraikina eraistea exijitu dute behin baino gehiagotan.
Erlazionatuta
* Eragile memorialistek Erorien Monumentua eraisteko exijitu dute
* Erorien Monumentuaren katalogo aldaketari alegazioak aurkeztu dizkiote
* Erorien monumentua: ke lainoak
Zehazki, Vianako Printzearen baimenak aukera ematen du eraikin nagusian eta sotoan lan egiteko. Horri esker, zenbait elementu desagerrarazi ahalko lirateke; besteak beste, Mola eta Sanjurjo general kolpisten gorpuak hartu zituen kripta eta monumentuaren alboko galeriak.
Kupularen barnealdean dauden pinturek, ordea, babes berezia dute, eta horiek mantendu beharko lirateke; eta kupulan bertan «esku-hartze arina» egiteko baimena eman du Vianako Printzea erakundeak, hura erabat bota gabe, betiere. Kanpoaldeari dagokionez, udalak eraikina eraldatu edo estali ahalko du.
Edonola ere, hori guztia proiektu arkitektoniko batean zehaztu beharko du udalak. Horretarako, ideia lehiaketa bat antolatuko dute, 2018. urtean egin bezala.
